#VinDiCated

Sa mundo ko na gawain at tanawin ay nakakasawa

Dumating ang isang bagong mukha

Na may kawangis pero 'di ko maalala

Pumukaw sa interes at atensyon ko ay kinuha

Sa dakong aking pinuntahan

Upang lamnan ang aking kumakalam na tiyan

Pero maging puso't kaluluwa ko ay napunan

Dahil naroon ka't unang nasilayan

Dahil sa 'di ka matitigan

Humanap ako ng iyong larawan

Ngunit nang 'di sapat ang natagpuan

Pa-sulyap-sulyap ang sinubukan

Tuwing lalakad patungo sa talon

Upang pawiin ang uhaw

Di ko mapigilang lumingon

Para tignan ang taglay mong tanglaw

Ilang beses nag-krus ang ating landas

Minsan ika'y nagmamadali na tila umiiwas

Minsan nama'y nalanghap ang iyong mabangong samyo

Ngunit mas madalas na magulat at mapatigil sa paghinga ko

Binalikan ko ang mga kanta

Na nasa aking alaala

Upang hanapin kung ano ang tutugma

Sa aking nadarama

Nilunod ko ang aking sarili sa iba't ibang awitin

Kakaibang saya at pagbabago sa akin ay napansin

Bumuo ako ng mga tagpo at ideya tungkol sa'ting dalawa

Noon ay aking itinatanggi, pero inamin ko na din na gusto kita

Nang malaman ko ang ilang piraso ng iyong katauhan

Nabatid kong dapat nang itigil ang aking kahibangan

Pero naisip kong pagtigil ay 'di dapat sapilitan

Kailangan munang tanggapin, aminin at sabihing lilipas at dadaan lamang

Tila isa kang pagsusulit para sa akin

Na sumubok sa kaalaman ko sa aking pagkatao

'Di sigurado kung dinulot ay pagkilala o pagkalito

Masarap at masaya kahit kasalanan man maituturing

Dapat nang itigil itong aking nadarama

'Pagkat sa alam kong ito'y mali at kakaiba

'Di tayo magka-antas at ika'y may kabiyak na

Higit sa lahat, tayo ay magkatulad pa

Pinagdadaanan ko'y walang mapagsabihan

Kaya sa pagsulat nito ibinuhos ang lahat

Baka sakaling matapos na at damdamin ay maibsan

Kaysa ang dibdib at isip ay sumambulat

Sabi nila, 'di mo malalaman kung 'di susubukan

Pero ayoko dahil natimbang at alam kong ito'y 'di tama

Kaya't pagtingin sayo'y sa dasal na lang idadaan

Na sa susunod kong buhay, ika'y makilala at tayo ang para sa isa't isa

P.S.

Kaya nais ko nang mawala ang pagtingin sa'yo

Sapagkat ako'ynapapagod na din

Isip ako ng isip sa'yo hanggang sa magulo't malito

Samantalang ako'y 'di mo man lang kilala at 'di napapansin